Arshdeep Singh finally got a chance to make his T20 debut against England after waiting for two series

ਆਈਪੀਐਲ ਵਿੱਚ ਆਪਣੀਆਂ ਗੇਂਦਾਂ ਨਾਲ ਬੱਲੇਬਾਜ਼ਾਂ ਲਈ ਮੁਸੀਬਤ ਖੜ੍ਹੀ ਕਰਨ ਵਾਲੇ ਅਰਸ਼ਦੀਪ ਸਿੰਘ ਨੂੰ ਆਖਿਰਕਾਰ ਦੋ ਸੀਰੀਜ਼ ਦੇ ਇੰਤਜ਼ਾਰ ਤੋਂ ਬਾਅਦ ਇੰਗਲੈਂਡ ਦੇ ਖਿਲਾਫ ਟੀ-20 ਡੈਬਿਊ ਕਰਨ ਦਾ ਮੌਕਾ ਮਿਲ ਗਿਆ। ਮੈਚ ਤੋਂ ਪਹਿਲਾਂ ਕਪਤਾਨ ਰੋਹਿਤ ਸ਼ਰਮਾ ਨੇ ਉਨ੍ਹਾਂ ਨੂੰ ਟੀਮ ਦੀ ਕੈਪ ਸੌਂਪੀ। ਉਸ ਨੂੰ ਦੱਖਣੀ ਅਫਰੀਕਾ ਅਤੇ ਆਇਰਲੈਂਡ ਖ਼ਿਲਾਫ਼ ਲੜੀ ਵਿੱਚ ਆਪਣੇ ਡੈਬਿਊ ਲਈ ਇੰਤਜ਼ਾਰ ਕਰਨਾ ਪਿਆ ਸੀ।ਸਲੈਗ ਓਵਰਾਂ ਵਿੱਚ ਆਪਣੀ ਸ਼ਾਨਦਾਰ ਗੇਂਦਬਾਜ਼ੀ ਲਈ ਜਾਣੇ ਜਾਂਦੇ ਅਰਸ਼ਦੀਪ ਸਿੰਘ ਨੇ ਆਪਣੇ ਟੀ-20 ਡੈਬਿਊ ਵਿੱਚ ਵੀ ਇਹੀ ਪ੍ਰਦਰਸ਼ਨ ਜਾਰੀ ਰੱਖਿਆ। ਉਸ ਨੇ ਇੰਗਲੈਂਡ ਖ਼ਿਲਾਫ਼ ਪਹਿਲੇ ਟੀ-20 ਵਿੱਚ 3.3 ਓਵਰ ਸੁੱਟੇ ਅਤੇ ਸਿਰਫ਼ 18 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ। ਉਸਨੇ ਰੀਸ ਟੈਪਲੇ ਨੂੰ ਆਪਣੀ ਪਹਿਲੀ ਟੀ-20 ਆਈ ਵਿਕਟ ਲਈ ਆਊਟ ਕੀਤਾ।

16 ਸਾਲ ਬਾਅਦ ਕਿਸੇ ਗੇਂਦਬਾਜ਼ ਨੇ ਡੈਬਿਊ ਮੈਚ ‘ਚ ਮੇਡਨ ਓਵਰ ਸੁੱਟਿਆ ਹੈ। ਅਜਿਹਾ ਕਰਨ ਵਾਲੇ ਉਹ ਦੂਜੇ ਭਾਰਤੀ ਗੇਂਦਬਾਜ਼ ਬਣ ਗਏ ਹਨ। ਉਨ੍ਹਾਂ ਤੋਂ ਪਹਿਲਾਂ ਅਜੀਤ ਅਗਰਕਰ ਨੇ 2006 ‘ਚ ਦੱਖਣੀ ਅਫਰੀਕਾ ਖਿਲਾਫ ਮੈਚ ‘ਚ ਇਹ ਉਪਲੱਬਧੀ ਹਾਸਲ ਕੀਤੀ ਸੀ। ਮਹਿਲਾ ਕ੍ਰਿਕਟ ਦੀ ਗੱਲ ਕਰੀਏ ਤਾਂ ਝੂਲਨ ਗੋਸਵਾਮੀ ਨੇ 2006 ‘ਚ ਇੰਗਲੈਂਡ ਖਿਲਾਫ ਇਹ ਉਪਲੱਬਧੀ ਹਾਸਲ ਕੀਤੀ ਸੀ।

ਅਰਸ਼ਦੀਪ ਸਿੰਘ ਨੂੰ ਆਪਣੇ ਟੀ-20 ਡੈਬਿਊ ਲਈ ਲੰਬਾ ਸਮਾਂ ਇੰਤਜ਼ਾਰ ਕਰਨਾ ਪਿਆ। ਇਸ ਤੋਂ ਪਹਿਲਾਂ ਉਸ ਨੂੰ ਦੱਖਣੀ ਅਫਰੀਕਾ ਖਿਲਾਫ 5 ਮੈਚਾਂ ਦੀ ਸੀਰੀਜ਼ ‘ਚ ਮੌਕਾ ਨਹੀਂ ਮਿਲਿਆ ਸੀ ਅਤੇ ਜਦੋਂ ਟੀਮ ਆਇਰਲੈਂਡ ਪਹੁੰਚੀ ਤਾਂ ਉਸ ਨੂੰ ਭਰੋਸਾ ਸੀ ਕਿ ਉਸ ਨੂੰ ਇੱਥੇ ਖੇਡਣ ਦਾ ਮੌਕਾ ਮਿਲੇਗਾ। ਪਰ ਉਮਰਾਨ ਮਲਿਕ ਆਇਰਲੈਂਡ ਦੌਰੇ ‘ਤੇ ਡੈਬਿਊ ਕਰਨ ‘ਚ ਕਾਮਯਾਬ ਰਹੇ। ਉਮੀਦ ਹੈ ਕਿ ਉਸ ਨੂੰ 3 ਮੈਚਾਂ ਦੀ ਟੀ-20 ਸੀਰੀਜ਼ ਦੇ ਬਾਕੀ ਦੋ ਮੈਚਾਂ ‘ਚ ਵੀ ਖੇਡਣ ਦਾ ਮੌਕਾ ਮਿਲੇਗਾ।